LA MADUNÒINA 'T LA MI CAÈSA 'D 'NA VOLTA
Cvant che una volta s'la mi fameja a simi casint puret 't la Velagrapa,
't la casaza duvò ch'a stimi, la mi nòna un altarin la s'era fata,
l'era sòura la porta sgangaraèda ch'la purtaèva int e' stalèt
duvò ch'la tnòiva i cunei int al steji e che par nòun l'era e' gabinèt.
Invezi al galòini agl'j era spargujeun, agl'j andeva 't i cantir 'd spagnera ros,
s'la straèda, s'la viola, tònda caèsa e zirandlòuni slongh i fos.
Int cl'altarin la j avòiva mes 'na Madunòina 'd zès
èlta 'na spana e un po', una rubèta 'd niseun interès,
mo dal volti 'd sòira e putòiva capitaè, e l'era nurmaèl,
che una galòina l'an turnes ma caèsa 't e' pulaèr,
alòura la mi nòna drì la madunòina la zandòiva 'na candòila benedèta,
l'era la candòila ch'e laseva e' prit int cla caèsa purèta
cvant ch'l'avnoiva a benedoila sòta Pascva,
e che ui scvizeva 'd cva e 'd là, dò gòzli 'd acva.
Pu, da par lì, lai giòiva e' rusaèri e in dialèt de' curiòus patèr,
e...mirèacval, la matòina dòp, tot a pòst, la galòina la j era 't e' pulaèr.
Sè, u n'era un mirecval gros, rubina,
mo ènca la statuvina u n'era un gran saché e pu la j era znina.
Int al cisi invezi al Madòni agl'j bèli grandi
parché di bsògn ui n'è a stof e 'na masa agl'j è al dmandi.
Adès pu i mirecval j è da ès gros, j a da rivé int tot e' mònd,
cio, si vint 'd guèra ch'us sint a sufié, niseun e pò faè e' vagabònd,
e saria ben acsè che coi ch'e cròid 't al madòni l'andes 't i santueri
e cminzes a daès da faè a prigaè e a sgarnaè curòuni 'd ruseri,
che stavolta al bòmbi al chesca dimpartot e agl'j è 'na masa gròsi
e ènca i mirecval j è da ès gros, sinò, cardint o scardint, u s' va insen sploi 't al fòsi
LA MADONNINA NELLA MIA CASA DI UNA VOLTA
Quando con la mia famiglia eravamo casanti poveri nella Villagrappa,
nel tugurio dove abitavamo, mia nonna un altarino si era fatta,
era sopra una porta sgangherata che portava allo stalletto
dove ci teneva i conigli nelle stie e per noi questo era il gabinetto.
Invece le galline erano libere, andavano nei campi di trifoglio rosso,
sulla strada, sulla viola, attorno casa, nei campi e sparse lungo qualche fosso.
Nell'altarino aveva collocato una Madonnina di gesso
alta una spanna e un po', una cosina, di nessun interesse
ma a volte a sera poteva accadere, ed era un normale guaio,
che una gallina non tornasse a casa nel pollaio,
allora mia nonna vicino alla Madonna, accendeva una candela benedetta,
era la candela che lasciava il prete in quella casa poveretta
quando veniva a benedire sotto Pasqua,
e spruzzava qua e là due gocce d'acqua.
Poi, da sola, le recitava una corona di rosario e delle strane preghiere in dialetto,
e...miracolo, la mattina dopo la gallina era nel pollaio e tutto era perfetto.
Sì, non era un miracolo grosso, una cosina
ma anche la statuetta non era appariscente, era piccolina.
Invece belle e grandi sono le Madonne nelle chiese cattoliche
perché di bisogni ce ne sono tanti e tante sono le suppliche.
Adesso poi i miracoli devono essere enormi, devono giungere in tutto il mondo,
ohi, coi venti di guerra che si sentono soffiare, nessuno può fare il vagabondo,
sarebbe opportuno allora che i devoti alle madonne si recassero in un santuario
e cominciassero a darsi da fare con le preghiere e sgranare corone di rosario,
che stavolta le bombe cadono dappertutto e sono molto grosse,
i miracoli devono essere grossi, sennò, credenti o no, si va insieme sepolti nelle fosse.
Ultimi Commenti