Cristian, at las la biciclèta da cheursa un po' malandaèda,
la j à bsògn t'ai daga una bèla radanaèda,
guerda ma tot inquèl e fai un un cuntròl
parchè l'è un pèz ch'ai toir e' còl.
Um paèr che da un bèl po' la bata in tèsta e la faza i caprez:
ciuladez, scatramaz, scricadez….
ou, un gn'è modi 'd faè una pedalaèda da zet
e pez l'è quant che sòura i pedel am met dret.
Tra al rudeli de' cambi u j è quaicosa maèl ardot
mè a degh ch'u j à fat e' noid i grel e i pasarot,
doi...o l'è tot un crì-crì
o un gran casòin 'd cì-cì.
Sòta la goma, int e' zarciòun,
u j è da l'ès un criceto malanòun,
propi eun 'd chi surgatin ch'i cor s'una rudèla,
e a sò prinfena cunvòint che sòta la sèla
ui sipa una scola 'd s-ciucaròin,
t'è inamòint quei ch'i sbat al frosti drì ma la musica e i balaròin?
Eh sè, mè a degh che int un cantòun pursì de' tlaèr,
ai n'ò instèca una banda intira ch'i sarà un zantnaèr,
e at dirò che chi burdlaz j à imparaè propi ben:
s-ci ciòk...s-ci ciak...s-ci ciòk...s-ci ciak... e tot insen.
Duvò ch'a pas mè sa sta biciclèta,
l'è sempra un dè 'd fèsta benedèta.
La messa a punto della bicicletta
Cristian, ti lascio la bicicletta da corsa un po' malandata, \ ha bisogno che tu le dia una bella aggiustata \ guarda a ogni elemento e falle un controllo \ perché è parecchio tempo che le tiro il collo. \ Mi pare che da un bel po' batta in testa e faccia i capricci: \ cigolii, rumori e altri impicci... \ ohi, non c'è modo di fare una pedalata stando zitto. \ il peggio accade quando sui pedali sto dritto. \ Tra i pignoni del cambio c'è qualcosa malridotto \ io dico che vi han fatto il nido i grilli e qualche passerotto, \ dì...è tutto un un crì-crì! \ o un gran casino di cì-cì. \ Sotto la gomma nel cerchione, \ ci deve essere un criceto chiassone, \ proprio uno di quei topolini che corrono su una rotella \ e sono persino convinto che sotto la sella \ ci sia una scuola di schioccatori, \ hai in mente quelli che sbattono le fruste a tempo di musica e coi danzatori? \ Ecco, io dico che in un anfratto qualsiasi del telaio, \ ne abbia inserita una intera banda che saranno un centinaio, \ e ti dirò che quei giovanotti hanno imparato proprio bene: \ s-ci ciok...s-ci ciak...s-ci ciok...s-ci ciak... e tutti insieme. \ Dove passo io con questa bicicletta, \ è sempre un giorno di festa benedetta.
Ultimi Commenti