TRAPLEUN E TRAPLÉ - TRUFFATORI E TRUFFATI (2)

TRAPLEUN E TRAPLÉ - 2 -

Cla matòina però 't e' partoi un gn'era guasi niseun, j era tot vì par urganizaè al fèsti dl'Unità e a badaè m'incvèl u j era una ragaza ch'l'era da un po' ch'la s'avdòiva a lè 'd dròinta e mè l'era da poch ch'a la cnusòiva par avòila incuntraèda int i curidori o poch piò.  Ai racòunt la situazion e a la fòin ai degh di suld e lì la scrola la tèsta.

“Cvèst l'è un furbaciòun e fa e' cumunesta par frigaès di suld, mè an ma fòid!”.

“Sint, mè a ne sò s'l'è un impustòur e a ne sò gnenca s'l'è vèra ch'l'è un cumpagn cilen e ch'l'è staè in galera par coipa 'd Pinochet,  a santoil a zcòr e parria 'd sè, pu va a capoi tè... mu mè um paèr eun ch'l'à bsògn e int e' dobi an voi faè la figheura de' sbatipali e na daèi un aieut, i sa faè tot a d'andaè in piaza e a rogg pr'e' Cile pu ta n'incheuntar eun ch'u dmanda  aieut e sèl ch'ai gen? Na ta t'arangg! Sint tè ta j è sti suld, che mè an gn'ò?”.

“Sè, mè a j avria, mu i n'è i mi, j è de' partoi e mè a m'un ciap la responsabilità 'd butei vì, tanimodi a sò sicheura che cvèst l'è un impustòur!”.

Mè a guardaèva un pèz ma lì e un pèz ma leu, ch'e feva tot al fazi, cvant ch'a zcuròiva mè, u j avnoiva un surois s'la bòca, cvant ch'e zcuròiva lì, e feva e meus ingrugnoi e e tireva sò se' naès cmè s'u j avnes da pienz.

“Sint,”, ò det ma la ragaza, “s-ciantema sta cvis-ciòun ch'am sò stof 'd campaè sa sti dobi, tè dai chi suld e mè at garantes che s'un si manda indrì, òintra 'na stmaèna, a i met mè!”.

“Ta me met par scret e s'la firma?”.

“A faz tot cvèl che t vu, tanimodi a sò sicheur che cvèst l'è un ragaz par ben, figuresmi sa tot cvèl ch'l'à cnu patoi fena adès, a mi met ènca mè a faèl bazilé?”.

An sò staè un po' brosch sa lì, mo cio, ch'la burdliscòta ch'l'am vlòiva insgné mu mè sèl ch'avòiva da faè, l'am deva un zert fastoidi e pu a gnenca fides d'un cumpagn ch'e vnoiva da e' Cile e chl'era staè in parsòun pr'al su ideji? Sèl ch'andimi a faè alòura mi cuncirt d'j Intillimani? Bèla fadoiga a faè i cumesta semza duvòi mai meti la faza!

Leu l'à tirat un fié longh 'd sudisfazioun e l'à det ma la ragaza 'd scroivi s'un foi l'indirez de' partoi e i nomar dla baènca duvò ch'l'avòiva da mandaè i suld.

Oh, ai sem! La ragaza la i dà sti suld scrulend la tèsta e e' foi duvò ch'u j era scret tot cvèl ch'ui vlòiva par faè e' bunefich, leu ui ciapa, ui dà 'na strèta 'd maèna e mu mè u m'abraza cmè s'a fos e' su fradèl e um ripet un sach 'd volti ch'a stes sicheur che i suld j ariveva e prèst, adès l'andeva a faè l'autostop fena Remin, da cvè e ciapaèva e' treno par Ancòuna, lundè l'arpartoiva e mert um spedoiva i suld.

Un' aènta strèta 'd maèna e pu e ciapa la cheursa 'd scaranaèda parchè dis ch'l'avòiva pressia d'arivé a Remin, ai vlòiva guasi doi ch'al purtaèva mè, mo pu u m'è vnu inamòint ch'avòiva d'andaè da la mi ma a ritiré e' fiul e ch'l'era zà taèrd.

A ringraèzi la ragaza dla pazinzia, a faz al scaèli a la svelta par scapaè da lè e andem a caèsa, mo an vègh instèch 't e' vaès daglj urtensji 'd fura 'd scapènt d'la porta d'la sede, un fòi pighé cmè cvèl ch'u j avòiva daè la ragaza me' compagno cilen?

Um s'è ferum e' cor, a l'ò tolt sò ch'um tarmaèva al maèni, a tnòiva e' fié e a prigaèva e' mi signòur ch'un fos sèl ch'a pansaèva, a l'ò vert e... l'era propi che foi.

Oh, putaèna, putaèna, u m'à ciavé!

A cor 'd ciòura e a j e faz avdòi ma la ragaza che sobit:

“A te giòiva mè che cvèst l'era un traplòun!”.

“Sè, mo un po' ès andaè taènt dalongh, valà ch'al ciap e am faz daè i suld indrì e sinò l'è bòti, ai faz santoi e' cumunoisum italien a chilz 't e' cheul!”.

A mòunt sò 't la zòinczent Fiat sicheur che tanimodi l'è s'la via Emilia che fa l'autostop, invezi gnent, un gn'era invel. E starà par rivé a Remin, al ciap ma la staziòun, acsè e pò ès ch'ui sipa ènca la pulizì, bene, sobit in galera, ai faz avdòi mè, valà ch'a i faz avnoi inamòint la pulizì 'd Pinochet, cvèl l'è eun ch'un s' merita gnent e se in Cile l'è staè in galera, u n'è staè 'd sicheur par la puletica, mo parchè l'è un laèdar da fat e sa l'òs-cia cvanti ch'u n'à cumbiné e cvant ch'u n'à fat pataca cmè mè.

Ò guaèrs in tot i beus dla staziòun avaènti e indrì, mo de' “compagno cileno” a gnenca l'ombra. A j ò biasé taènt 'd cal malediziòun che sa s'al tacaèva toti par leu e saria staè molt pez che finoi tr'al maèni di fasesta cilen.

Gnent da faè però, am sò cnu rasigné, ò fat la straèda d'artòuran s'una boilia madòs ch'andeva fort cmè 'na lumega parchè an savòiva cmè ch' faè a doi ma caèsa ch'am s'era fat frigaè cmè un pataca.

U j è vleu un po' a ingulaè e' ròsp e u n'era ancòura pas da fat, che du dè dòp a sint me' giornale-radio dla regiòun ch'i doi che i carabinir j avòiva ciapaè ma la staziòun d'Arzeun un spagnul suspèt e senza documòint e che pu l'è vnu fura ch'l'era un rabazir ch'ui deva la caza al pulizì 'd mèza Europa.

“Mo pòrca putaèna, snò i carabinir 'd Samaèvar i ne savòiva? L'è staè prinfena in caserma e lòu un ni vo gnent ch'i j epa ènca pagaè e' cafè? Ah, l'è ch'i s'n'in fròiga tot, valà ch'i m'un ceva piò, da adès in avaènti: “tolleranza zero” sa tot, tanimodi ò vest che a daè cunfidenza ma la zenta u j è sempra d'armetji, ah sé e basta a faè e'  cvajòun, e' mònd l'è pin 'd delincvint e alòura bsògna faè cmè lòu, ou cio, cvant ch'l'ai vo l'ai vo!”.

Al giòiva e da bon a s'era cunvòint, mo la stmaèna dòp, ch'a s'era darnov ma caèsa da par mè, al nov dla matòina darnov e sòuna e' campanèl dla porta, darnov a vagh arvoi e am trov davaènti un umarein aèlt un metar e gnent, s'una valoisa ch'la psaèva piò ch'n'è leu, sti ben, s'la cruvata e s'una camoisa bienca ch'la grundaèva 'd sudòur.

Mè an savòiva ch'sèl doi, mo leu s'un surois:

“Il signor Maroni, presidente della Fondazione Pascoli? Mi chiamo Akio Uesughi, sono  docente di cultura italiana presso l'Università  di Osaka in Giappone e ho bisogno di lei!”.

An gn'ò pansaè un sgònd 'd piò e pròima ch'e fines 'd zcòr:

“Òintra, metti còmòd e racòuntmi sèl ch'a pòs faè par tè!”.

A giroi a ste peunt ch'a sò un pataca finoi e ch'a m'li vagh a zarcaè al frigaèdi, l'è ch'a ni pòs faè gnent, cvèsta l'è la mi nateura e sò da capaè  tra i trapleun e i traplé, tra coi ch'u li dà e coi ch'u li ciapa, a n'ò dobi, mè a stagh sempra sa cvei ch'i li ciapa ènca se pu e va a finoi ch'a li ciap ènca mè!

TRUFFATORI E TRUFFATI - 2 - 

Quella mattina però nel la sede del partito a Savignano non c'era quasi nessuno, erano tutti via per  organizzare le feste dell'Unità e a sovrintendere a tutto c'era una ragazza che era da un po' che si vedeva lì dentro e che io conoscevo solo per averla nei corridoi o poco più. Le racconto la situazione e alla fine le dico dei soldi e lei scrolla la testa.

“Questo è un furbacchione, fa il comunista per sgraffignare dei soldi, io non mi fido!”.

“Ascolta, io non lo so se è un impostore e non so neanche se è vero che è un compagno, a sentirlo parlare, sembrerebbe di sì, vai poi a capire tu... a me pare uno che ha bisogno e nel dubbio non voglio fare la figura del menefreghista e non aiutarlo, san fare tutti ad andare in piazza e manifestare per il Cile, poi ne incontri uno che ti chiede aiuto e noi cosa gli rispondiamo? No, arrangiati! Senti, tu li hai questi soldi che io al momento non ho?”.

“Sì, io li avrei, ma non sono i miei, sono del partito e io non mi prendo la responsabilità di buttarli via!”.

Io osservavo un attimo lei e un attimo lui, che assumeva tutte le espressioni, quando parlavo io, gli veniva un sorriso sulla bocca, quando parlava lei, faceva il viso corrucciato.

“Senti”, ho detto alla ragazza, “schiantiamo questa questione che mi sono stufato di vivere nel dubbio, tu dagli quei soldi e io ti garantisco che se non ce li rimanda indietro entro una settimana, li rimborso io!”.

“Me lo metti per iscritto e con la firma?”.

“Faccio tutto ciò che vuoi, tanto sono sicuro che questo è un ragazzo per bene, figuriamoci se con tutto quello che ha dovuto sopportare fino ad adesso, mi ci metto anch'io a farlo patire!”.

Sono stato un po' brusco con lei, ma ohi, quella ragazzotta che voleva insegnare a me cosa dovevo fare, mi procurava un certo fastidio e poi non fidarsi neanche di un compagno che viene dal Cile? 

Lui ha emesso un lungo respiro di soddisfazione e ha chiesto alla ragazza di scrivergli su un foglio l'indirizzo del partito e i numeri della banca a cui doveva spedire i soldi.

Oh, finalmente ci siamo! La ragazza gli allunga questi soldi ondeggiando la testa e il foglio dove c'era scritto tutto ciò che occorreva per fare il bonifico, lui li prende, le dà una stretta di mano, mi abbraccia come se fossi suo fratello e mi ripete un sacco di volte di stare sereno che i soldi sarebbero arrivati presto, ora andava a fare l'autostop fino a Rimini, di qui prendeva il treno per Ancona, lunedì ripartiva e martedì mi spediva i soldi.

Un'altra stretta di mano e poi prende la corsa precipitosamente perché diceva che aveva molta fretta di giungere a Rimini, stavo per dirgli che lo portavo io, ma poi mi è venuto in mente che dovevo andare a ritirare il figlio dalla nonna ed era già tardi.

Ringrazio la ragazza per la pazienza, scendo le scale per uscire di lì e non vedo nascosto nel vaso delle ortensie fuori dalla porta della sede, un foglio piegato come quello che gli aveva consegnato la ragazza?

Mi si è fermato il cuore, l'ho sollevato che mi tremavano le mani e trattenevo il fiato pregando il mio dio che non fosse ciò che temevo, l'ho aperto e... era proprio quel foglio.

Oh porca puttana, mi ha ingannato!

Corro di sopra e glielo faccio vedere alla ragazza che immediatamente:

“Te lo dicevo io che questo era un imbroglione!”.

“Sì, ma non può essere andato lontano, valà che lo catturo e mi faccio dare indietro i soldi, sennò sono botte, gli faccio sentire la forza del comunismo italiano a calci nel sedere!”.

Salgo nella cinquecento Fiat sicuro che tanto è sulla via Emilia che fa l'autostop, invece niente, non c'era da alcuna parte. Starà per giungere a Rimini, lo prendo alla stazione, così può darsi che ci sia anche la polizia, bene, subito in galera, gli faccio vedere io, valà che rimpiangerà la polizia di Pinochet, quello è uno che non si merita niente.

Ho ispezionato tutti gli anfratti della stazione avanti e indietro, ma del compagno cileno neanche l'ombra. Gli ho augurato tante di quelle maledizioni che se si avveravano tutte, sarebbe stato per lui ben peggio che finire tra le mani dei fascisti sudamericani.

Niente da fare però, mi sono dovuto rassegnare, ho ripreso la strada del ritorno con una grande angoscia in corpo che procedevo come una lumaca perché non sapevo come fare a dirlo a casa che mi ero fatto raggirare come un imbecille.

C'è voluto un bel po' di tempo ad ingoiare il rospo e non era ancora ben digerito, che due giorni dopo ascolto per caso al giornale-radio regionale l'annuncio che i carabinieri aveva catturato alla stazione di Riccione uno spagnolo sospetto e senza documenti e che poi è risultato essere un delinquente ricercato dalle polizie di mezza Europa.

“Ma porca puttana, solo i carabinieri di San Mauro non lo sapevano? È stato persino da loro in caserma e non ci vuol niente che gli abbiano offerto il caffè! Ah, è che se ne fregano tutti, valà che non ci casco più più, d'ora in poi: tolleranza zero con tutti, tanto ho visto che dare confidenza alla gente c'è sempre da rimetterci, ah sì basta fare il coglione, il mondo è pieno di delinquenti e allora bisogna fare come loro, ah sì, quando ci vuole, ci vuole!”.

Lo pensavo e sul serio ne ero convinto, ma la settimana successiva, che ero ancora in casa da solo, alle nove del mattino suona nuovamente il campanello della porta, vado ad aprire e mi trovo di fronte un ometto alto un metro e niente, con una valigia che pesava più di lui, vestito bene, con la cravatta e una camicia bianca che grondava sudore.

Io non sapevo cosa dire, ma lui con un sorriso:

“Il signor Maroni, presidente della Fondazione Pascoli? Mi chiamo Akio Uesughi, sono  docente di cultura italiana presso l'Università  di Osaka in Giappone !”.

Non ci ho pensato un secondo in più e prima che terminasse di parlare:

“Entra, mettiti comodo e raccontami cosa posso fare per te!”.

Direte a questo punto che sono un coglione totale e che me le vado a cercare le fregature, è che non ci posso fare niente, questa è la mia natura e se devo scegliere tra i truffatori e i truffati, tra chi le dà e chi le prende, io non ho dubbi, sto con con chi le prende!